لە دوای بەڕازیل رێکۆردە مێژوویەکە لە دەستی ئیسپانیادا مایەوە

یاریگا –

هەڵبژاردەی ئیسپانیا، ئێستا تاکە هەڵبژاردەیە لە جیهاندا کە هەرگیز لە یارییەکانی پاڵاوتنەکانی جامی جیهانیدا، لە یاریگا و خاکی خۆیدا نەدۆڕاوە.

بەرەبەیانی ئەمڕۆ هەڵبژاردەی بەرازیل، لە یاریگای خۆیدا بەرامبەر ئەرجەنتین بە ئەنجامی 1-0 شکستی خوارد و ریکۆردی مێژوویی هەڵبژاردەکەی لە قۆناغی پاڵاوتنەکانی مجامی جیهانیدا لەدەستدا. پێش ئەم یارییە بەرازیل هیچ کاتێک لە پاڵاوتنەکانی مۆندیال لە یاریگای خۆیدا نەدۆڕاندبوو، بەڵام مێسی و هاوڕێکانی ئەم تۆمارە مێژوویەیان تێک شکاند.

بەم شێوەیە ئێستا تەنها یەک هەڵبژاردە ئەم ریکۆردەی هەیە و ئەویش ئیسپانیایە. تا مانگی ئازاری ساڵی 2022 ئەم ژمارە پێوانەییە بەدەستی سێ هەڵبژاردەی ئیتاڵیا و بەرازیل و ئیسپانیاوە بوو، بەڵام لە مانگی ئازاری ساڵی 2022، ئیتاڵیا لە یاری پێش کۆتایی پلەی ئۆفی پاڵاوتنەکانی جامی جیهانی قەتەر لە یاریگای خۆیدا بەرامبەر مێسۆدۆنیای باکوور شکستی خوارد و هەم ژمارەی پێوانەیی خۆی لەدەستدا و هەمیش نەیتوانی سەرکەوتن بۆ مۆندیالی قەتەر بەدەست بهێنێت. بەرازیلیش تاوەکوو بەرەبەیانی ئەمڕۆ لە ژمارە پێوانەییە لەدەست بوو.

ئیسپانیا کە لە ساڵی 1934ەوە تا ئێستا لە یاریگای خۆیدا لە یارییەکانی پاڵاوتنی مۆندیالدا بەشداری کردووە، بە تەنیا خاوەنی ئەم ژمارەی پێوانەیەیە. 52 بردنەوە و 10 یەکسانبوون لە یاریگای خۆیدا دەرئەنجامی کارەکانی لارۆخا بوو، لەم ماوەیەشدا ئیسپانیا تەنها لە ساڵی 1974 بە دۆڕان لە یوگۆسلاڤیا نەیتوانی سەرکەوێت بۆ مۆندیال.