یاریگا –
هاری کەین لە شکاندنی ریکۆردەکان ناوەستێت و خەریکە لە بەشی کۆتایی کاروانی وەرزشیدا، ناوی دەخاتە پاڵ ناوی گەورەکانی یارییەکە.
هەرچەندە پێشبینی دەکرا هەڵبژاردەی ئینگلتەرا بە ئەنجامێکی گەورەتر لە هەڵبژاردەی ماڵتا بباتەوە، بەڵام کەین پارێزگاری لە بەردەوامی هەژاندنی تۆڕی گۆڵی رکابەرانی کرد و لە خولەکی 75ی یارییەکە گۆڵێکی کرد.
ئەمە 15-مین گۆڵی کەین بوو لە هەشت یاری یەک لە دوای یەکی میونشن و ئینگلتەرا و ئەمەش ریکۆردێکی ناوازەیە بۆ کەین.
Harry Kane goal , assist Saka pic.twitter.com/HqbUPiBVeg
— Mo (@AHAT_4567) November 17, 2023
کەین یەکێک بوو لە باشترین یاریزانانی یارییەکەی شەوی رابردووی هەڵبژاردەی سێ شێرەکان. لەوەتەی پەیوەندی بە میونشنەوە کردووە، کەین 21 گۆڵی لە 16 یاریدا کردووە و پێدەچێت، کەس توانای وەستاندنی ئەستێرەی پێشووی تۆتنهامی نەبێت.
لە گرێبەستی نێوان کەین و میونشندا هاتووە، ئەگەر ئەستێرە ئینگلیزییەکە لەم وەرزەدا 40 گۆڵ بکات، ئەوا بڕی 250 هەزار یۆرۆ وەک شیرینی وەردەگرێت. هێشتا نەگەیشتووینەتە ناوەڕاستی وەرز و کەین زیاتر لە نیوەی گۆڵی داواکراوی کردووە.
دووشەممە هەڵبژاردەی ئینگلتەرا رووبەڕووی هەڵبژاردەی ماسێدۆنیای باکوور دەبێتەوە و چاوی لە شکاندنی ریکۆردی زیاترە.
