تەواو، دواجار پاریس سانجێرمان گڵۆپی سەوزی بۆ ئێمباپێ هەڵکرد
پاریس سانجێرمان تەواو بێ ئومێد بووە و گڵۆپی سەوزی بۆ کیلیان ئێمباپێ هەڵکردووە، هیچ ئۆفەرێک بۆ نوێکردنەوەی گرێبەستەکەی پێشکەش ناکات.
رۆژنامەی ئاسی ئیسپانی ئاشکرایکردووە، پاریس سانجێرمان هیچ ئۆفەرێک بۆ نوێکردنەوەی گرێبەستی کیلیان ئێمباپێ پێشکەش ناکات، بەڵکو یانە فەرەنسییەکە بە تەواوەتی لە مانەوەی ئێمباپێ بێ هیوا بووە، بۆیە گڵۆپی سەوزی هەڵکردووە و دڵنیایە لەوەی هاوینی داهاتوو ئێمباپێ یانەکە بەجێدەهێڵێت.
رۆژنامە مەدریدییەکە ئاشکراشیکردووە، بەرپرسانی پاریس تاکە هیوایان ئەو بەندەیە کە لە گرێبەستەکەی ئێمباپێدا هاتووە، ئەگەر هەردوولا بیانەوێت ئێمباپێ دەتوانێت هاوینی داهاتوو گرێبەستەکەی بۆ وەرزێکی دیکەش درێژ بکاتەوە.
ریال مەدرید سەرەڕای نزیکبوونەوەی ئێمباپێ لە رۆیشتن، ئامادە نییە هیچ جولەیەک بکات و نایەوێت یاساکانی فیفا بشکێنێت، دەیەوێت تاوەکو سەرەتای ساڵی نوێ چاوەڕێ بکات، ئینجا لەگەڵ یاریزانەکە دەست بە گفتوگۆ دەکات.
ئێمباپێ هاوینی داهاتوو گرێبەستەکەی لەگەڵ پاریس سانجێرمان کۆتایی دێت و دەتوانێت بە گرێبەستێکی ئازاد ریزەکانی یانە فەرەنسییەکە بەجێبهێڵێت.
