شەڕی غەزە یارییەکی هەفتەی داهاتووی لالیگای دواخست
ئەمڕۆ لالیگا بەفەرمی رایگەیاند یاری نێوان مایۆرکا و کادێز لە هەفتەی داهاتووی لالیگا بۆ کاتێکی نادیار دواخراوە.
ئەم پێشهاتە دوای ئەوە هات، فیفا بڕیاریدا یارییە دواخراوەکەی نێوان ئیسرائیل و کۆسۆڤۆ لە 12ی ئەم مانگەدا ئەنجام بدرێت لە میانەی پاڵاوتنەکانی یۆرۆ. یارییە نێودەوڵەتییەکە بەهۆی شەڕی ئیسرائیل و حەماسەوە لە وادەی خۆیدا ئەنجام نەدرا.
بەروارە تازەکەی فیفا بۆ ئەنجامدانی ئەو یارییە هاوکاتە لەگەڵ بەڕێوەچوونی یاری مایۆرکا و کادێز لە لالیگا. وە ڤیدات موریکی هێرشبەری مایۆرکا ، یاریزانی هەڵبژاردەی کۆسۆڤۆیە و لە یاری یانەکەی دادەبڕا.
هەر بۆیە مایۆرکا، داوای دواخستنی یارییەکەیانی کرد لەگەڵ کادێز و رازی نەبوون بەوەی موریکی هێرشبەری یەکەمیان بەشداری یاری هەڵبژاردەکەی بکات و لە یانەکەی داببڕێت.
ئەمڕۆش لالیگا رایگەیاند بڕیاریانداوە یارییەکەی مایۆرکا و کادێز دوابخرێت.
کادێز بە 10 خاڵ و مایۆرکا بە 9 خاڵ لە ریزبەندی 16 و 17هەمی ریزبەندی لالیگان.
