یاریگا –
پاریس سانجێرمان دەیەوێت فرانچایزێکی تایبەت بۆ یاریی هونەرەکانی شەڕ MMA دروست بکات.
رۆژنامەی لیکیپ بڵاویکردووەتەوە، پاریس دەیەوێت لە سەرەتای ساڵی نوێ پڕۆژەکەی دەست پێبکات، پێشتر پەیوەندییەکی بەهێز و کاری هاوبەش لە نێوان سانجێرمان و حەبیب نوورمحەمەدۆڤ، پاڵەوانی یاری MMA هەبووە.
ناسر خلێفی، سەرۆکی پاریس سانجێرمان، بەردەوام خەونی بە گەورەکردنی یانەکە بینیوە و دەیەوێت بیکاتە لە باشترینەکانی جیهان، نەک تەنیا لەسەر ئاستی تۆپی پێی، بەڵکو تیمی بەهێزی جودۆ، تۆپی دەست و تەنانەت ئی سپۆرتسی دامەزراندووە. ئەمجارەیان دەیەوێت بە کردنەوەی بەشێکی تایبەت بە یارییەکانی MMA پاریس بباتە ئاستێکی دیکە.
کیلیان ئێمباپێ، ئەستێرەی پاریس سانجێرمان زۆر بە یارییەکانی MMA سەرسامە، لە ماوەی رابردوودا لە پاریس، ئامادەی یاری نێوان سێدریک دۆومبێ و جۆردان زێبۆ بوو.
View this post on Instagram
جەمیل بووڕاس، سەرۆکی تیمی جودۆی پاریس پاڵێوراوە تاوەکو ببێتە سەرۆکی تیمی MMA و رەنگە بە هاوبەشی لەگەڵ عەلی عەبدولعەزیز، راهێنەری دیاری MMA پڕۆژەکە بەڕێوەببەن.
رۆژنامەی لیکیپ روونیکردووەتەوە، پاریس دەیەوێت نوورمحەمەدۆڤ تێهەڵکێشی پڕۆژەکە بکات، تاوەکو دەنگدانەوەیەکی خێرا و کاریگەری هەبێت.
