مانچێستەر سیتی گرێبەستی هالاند نوێدەکاتەوە
یاریگا –
مانچێستەر سیتی ئینگلیزی دەیەوێت گرێبەستی ئێرلینگ هالاندی نەرویجی نوێبکاتەوە.
رۆژنامەی دەیلی مەیل بڵاویکردووەتەوە، مانچێستەر سیتی پلانی داناوە بۆ نوێکردنەوەی گرێبەستی ئێرلێنگ هالاند، ئەستێرە و گۆڵکاری تیپەکەی، لەگەڵ ناوبراو دەست بە گفتوگۆکردن بکات.
بەپێی هەمان سەرچاوە، بلوو موون نیازی وایە، گرێبەستی ئەستێرە نەرویجییەکە تا هاوینی ساڵی 2028 نوێبکاتەوە، مووچەی هەفتانەیشی بۆ دەکەن بە 400 هەزار پاوەند.
Man City are planning new contract talks with Erling Haaland https://t.co/EbbIAbvS3J
— Jack Gaughan (@Jack_Gaughan) October 5, 2023
ئەم هەوڵەی مانچێستەر سیتیش بەهۆی ریال مەدریدی ئیسپانییە، کە چاوی بڕیوەتە یاریزانەکە، نیازیان وایە لە هاوینی داهاتوو، هالاند بکەن بە یاریزانی ژمارە 9ـی تیپەکەیان.
بەوپێیەی رۆژنامەی سپۆرت لە راپۆرتێکیدا بڵاویکردووەتەوە، ریال مەدرید پلانی داناوە بۆ گواستنەوەی هێرشبەرە نەرویجییەکە لە هاوینی ساڵی 2024.
بەپێی هەمان سەرچاوە پێشبینی دەکرێت تێچووی ئەم گرێبەستە بگاتە 222 ملیۆن یۆرۆ، بەڵام مێرێنگی ئەمە بەزۆر نازانێت بۆ گۆڵکارە نەرویجییەکە و پێیوایە نرخێکی تەواو شایستەیە.
لە هاوینی ساڵی 2024 یاریزانەکە ئازاد دەبێت لە بڕیاردان بە مانەوە یان رۆیشتن، ئەویش بەهۆی کارابوونی مەرجێکی گرێبەستەکەی.
کارابوونی ئەو مەرجەی گرێبەستەکە هیوایەکی زۆری بە ریال مەدرید بەخشیووە تا لە ساڵی 2024 خەونە گەورەکەی بەدیبهێنێت و هالاند بکات بە یاریزانی ژمارە 9ـی.
بەپێ ئەو مەرجە یاریزانەکە دەتوانێت بە بڕی 180 ملیۆن یۆرۆ پەیوەندی بە یانەیەکی دەرەوەی پرێمەرلیگ بکات.
