یاریگا-یانەی ریاڵ مەدرید بۆ سێ یاری داهاتووی لالیگا بە بێ ناچۆ فێرناندێزی کاپتنی یەکەمی یانەکە دەبێت.
ناچۆ لە پێکهاتەی سەرەکی یانەکەدا بوو بەرامبەر جیرۆنا و ئاستێکی بەرزی نیشاندا بەڵام لە کۆتا خولەکەکانی یارییەکەدا بە توندی لە پۆرتوی یاریزانی تیمی بەرامبەریدا و راستەوخۆ بە کارتی سوور کرایە دەرەوە.
بەگوێرەی رۆژنامەی مارکا، یەکێتی تۆپی پێی ئیسپانیا بڕیاریداوە ناچۆ بۆ سێ یاری سڕبکرێت لە یارییەکانی ناوخۆی ئیسپانیا.
بەوەش ناوبراو لە یارییەکانی ئۆساسۆنا، سیڤیلیا و بارسێلۆنا بێ بەش دەبێت و دوو یاری کۆتاییان لە دەرەوەی یاریگای خۆیانە.
ئەمە لە کاتێکدایە، ریاڵ مەدرید لە ئێستادا تەنها یەک دڵی بەرگری سەلامەتی هەیە ئەویش رودیگەرە. هەریەک لە میلیتا و ئالابا پێکانیان هەیە، بەڵام چاوەڕواندەکرێت ئالابا بەمزوانە بگەڕێتەوە یاریگاکان.
