یاریگا –
باشترین ناوبژیوانی پرێمەرلیگ و ناوبژیوانی یاری کۆتایی جامی جیهانی قەتەر لەلایەن یەکێتی تۆپی پێی ئەم وڵاتە بۆ خولی رۆشنی سعودیە دەکرێنە ئامانج.
رۆژنامەی “گۆڵ”ی ئینگلیزی ئاشکرایکردووە، یەکێتی تۆپی پێی سعودیە دەرگای پەیوەندیکردن بە ناوبژیوانە پیشەگەرەکانی پرێمەرلیگ کردووەتەوە بۆ ئەوەی بیانگوازێتەوە پاڵەوانێتییەکانی سعودیە و تەنانەت بەدوای ناوبژیوانانی دیکەی ئەوروپادا دەگەڕێن.
دیارترین ناوبژیوانی ئینگلیزی مایکل ئۆلیڤەر لە پێشەنگی لیستە داواکراوەکەی ناوبژیوانانی خولی سعودیەدایە، بەو پێیەی ئەم ناوبژیوانە نێودەوڵەتییە بە یەکێک لە ناوبژیوانە دیارەکانی تۆپی پێی ئینگلیزی دادەنرێت و هەمیشە بەرپرسی ناوبژیوانی یارییە گرنگەکانە.
هەروەها سیمۆن مارچینیاکی پۆڵۆنیش لە لیستی ناوبژیوانانی سعودیەدایە کە ناوبژیوانی یاری کۆتایی جامی جیهانی 2022ی قەتەر بووە.
دوای هاوینە مێژووییەکەی گواستنەوەی یاریزانان بۆ سعودیە، یەکێتی تۆپی پێی سعودی هەوڵدەدات ئاستی ناوبژیوانەکانی خولەکەی بەرزبکاتەوە بۆ ئەوەی لەگەڵ ئاستی بەرزی تەکنیکی و رکابەریی خولی سعودیەدا بگونجێت.
