ریال مەدرید داهاتی زیاتر لە رێگەی زنجیرەی خواردنە خێراکان کۆدەکاتەوە
یاریگا
بەم نزیکانە یانەی ڕیال مەدریدی ئیسپانیا پەردە لەسەر لقی یەکەمی زنجیرە خواردنە خێراکانی خۆی لادەدات.
ماڵپەری فەرمی یانەی ریال مەدرید بڵاویکردەوە، یانەکەیان دەچێتە ناو پیشەسازی خۆراک و لە چەند مانگی داهاتوودا چەندین زنجیرەی خواردنی خێرا لە سەرانسەری جیهان دادەمەزرێنێت. ئەم چێشتخانانە لە ژێر ناوی هاوبەشی UNO (بە واتای یەک) لە وڵاتانی جیاوازدا دەخرێنە بازاڕەوە و مانگی داهاتوو لقی یەکەمیان لە شاری مەکسیکۆ سیتی پایتەختی مەکسیک دەکرێتەوە.
ڕیال مەدرید ئەم زنجیرە خواردنە خێرانە بە ئامانجی دروستکردنی شوێن لە سەرانسەری جیهان بۆ فراوانکردنی براندەکەی و ناسینی هاندەرانی و کۆبوونەوە بۆ سەیرکردنی یارییەکان و پەیداکردنی داهاتێکی زیاتر ئەنجام دەدات.
هەروەها لەم چێشتخانانە بەشێک هەیە بۆ ئەوەی هاندەرانی ڕیال مەدرید بتوانن بەرهەمی یانەکان بکڕن وەک جل و بەرگ و جانتا و پێڵاو و سەرجەم پێداویستیەکانی دیکەی وەرزشی.
