کاردانەوەی سەیری کلۆپ بەرامبەر گۆڵەکەی بێڵینگهام

یاریگا –

یۆرگن کلۆپ راهێنەری یانی لیڤەرپوول، کاردانەوەیەکی سەیری هەبوو کاتێک زانی جود بێلینگهام لەکۆتا خولەکەکانی یارییەکەی دوێنێ شەو بەرامبەر یونیون بەرلین گۆڵی تۆمار کرد.

لە یەکەم رۆژی قۆناغی کۆمەڵەکانی چامپیۆنزلیگ، ریال مەدرید لە یاریگای سانتیاگو بێرنابیۆ میوانداری یونیون بەرلینی کرد، بێلینگهامیش لە خولەکی 94 توانی گۆڵ تۆمار بکات. ئەمە شەشەم گۆڵی ئەم وەرزەی بێڵینگهام بوو بۆ یانەی ریال لە 6 یاریدا. هەروەها وەک باشترین یاریزانی یاریگا ناسێندرا.

بێلینگهام رێک لەو ساتەدا گۆڵی تۆمارکرد کە یۆرگن کلۆپی راهێنەری لیڤەرپوول لە کۆنگرەی رۆژنامەوانی یارییەکەدا لەگەڵ لاسکی نەمسایی لە یۆرۆپالیگ ئامادەبوو، راهێنەرە ئەڵمانییەکەش کاردانەوەیەکی سەرنجڕاکێشی بەرامبەر بەم بابەتە هەبوو.

یەکێک لە هاوڕێکانی کلۆپ ڤیدیۆی گۆڵەکەی بێلینگهامی پیشانی کلۆپ دا و ئەو باوەڕی نەدەکرد لە خولەکەکانی کۆتاییدا ریال بە گۆڵەکەی بێلینگهام جارێکی دیکە سەرکەوتنی بەدەستهێنا و تەنها گوتی: “بێلینگهام؟” پاشان کلۆپ سەری سوڕما و پێکەنی و سەری خۆی بادا.