بۆچی پاریس سانجێرمان بێڵینگهامی نەویستووە؟

یاریگا –

ئاشکرا بوو کە بۆچی پاریس سانجێرمان، دەرفەتی گواستنەوەی جود بێڵینگهامی لەدەستداوە.

رۆژنامەی لو پاریزیان بڵاویکردووەتەوە، بۆ گواستنەوەی جود بێڵینگهام، پاریس سانجێرمان نەیویستووە رکابەری ریال مەدرید بکات کە نرخی ئەستێرە ئینگلیزییەکە 103 ملیۆن یۆرۆ بووە.

ئەستێرە تەمەن 20 ساڵانییەکە لەم هاوینە بووە ئامانجی زۆرێک لە یانە گەورەکانی ئەوروپا، بەڵام خەونی ئەو یاریکردن بوو بۆ ریال مەدرید، هەر بۆیە مێرێنگی بە خێرایی گرێبەستی یاریزانەکەی بە بڕی 103 ملیۆن یۆرۆ لە بەرژەوەندی خۆی یەکلایی کردەوە.

بەپێی رۆژنامە فەڕەنسییەکە ساڵی رابردوو پاریس دەرفەتی گواستنەوەی بێڵینگهامی هەبووە، بۆ ئەو مەبەستەیش پەوەندی پێوەکراوە، بەڵام سانجێرمان بڕیاریداوە گرێبەست لەگەڵ بێڵینگهام نەکات.

لە بری ئەو فەڕەنسییەکان بڕیاریانداوە متمانە بە وارن ئێمری تەمەن 17 ساڵان ببەخشن، کە ناوبراو یاریزانێکی دەرچووی ئەکادمییای یانەکەیە. نەیانویستووە بڕە پارەیەکی زۆر لە گواستنەوەی ئەو یاریزانە خەرج بکەن.

سانجێرمان پێیوایە ئێمری دەتوانێت بگات بە هەمان ئاستی جود بێڵینگهام، متمانەیەکی زۆریان بە ئاستی یاریزانەکە هەیە. لەم وەرزەیش 5 یاری بۆ یانەکە کردووە و گۆڵێکیشی درووست کردووە.

لە لایەکی دیکە ئەستێرە لاوەکەی ریال مەدرید گۆڕانکارییەکی گەورەی لە یانەکەدا درووستکردووە، لە 5 یاریدا توانیویەتی 5 گۆڵ بۆ مێرێنگی بکات و گۆڵێکیش درووست بکات. پێشەنگی گۆڵکارانی لالیگایشی گرتووە، کە رەنگە ئێستا پاریسییەکان پەشیمانبن لە لەدەستدانی ئەو گەوهەرە بەتوانایە.