مانچێستەر یونایتد لە تۆمەتەکانی سەر ئانتۆنی بێ ئاگا بووە
یاریگا
کارگێری یانەی مانچێستەر یونایتد لە کاتی گواستنەوەی ئانتۆنی هێرشبەری بەڕازیلی بۆ یانەکانی، ئاگاداری ئەوە نەبووە کە بە ئازاردانی کچێک تۆمەتبارە.
رۆژنامەی تەلەگرافی بەریتانی بڵاویکردەوە، زیاتر لە سێ مانگ پێش گواستنەوەی ئەنتۆنی بەرامبەر 85 ملیۆن پاوەند لە ئەیاکسەوە بۆ مانچستەر یونایتد، دۆسیەیەکی دادگا لەسەر ئەو یاریزانە تۆمارکرا. بەپێی لێدوانی ئەو کەسەی کە گوایە قوربانییەکە بووە، دوای هێرشەکەی ئەنتۆنی پێویستی بە خزمەتگوزاری پزیشکی بووە لە نەخۆشخانەکەدا، بەڵام یاریزانەکەی هەڵبژاردەی بەڕازیل بە توندی ئەو لێدوانانە ڕەتدەکاتەوە.
مانچستەر یونایتد دەڵێت، پێش گواستنەوەی ئانتۆنی، هاوشێوەی پرۆسەی گواستنەوەی هەر یاریزانێکی تر، پاشخانی ئەم یاریزانەیان پشکنیوە، بەڵام هیچ حاڵەتێکی دەستدرێژی خێزانی یان تێوەگلانی پۆلیسیان نەدۆزیوەتەوە.
سەرچاوەکە بڵاویشی کردەوە بەرپرسانی شەیتانە سوورەکان ئەو کاتە ئاگادار بونە کە ئەو یاریزانەیان تۆمەتبارە، کاتێک میدیاکانی بەڕازیل ئەو هەواڵەیان بڵاوکردەوە.
