ئەنجامی کۆبوونەوەکەی تێن هاگ و سانچۆ راگەیەندرا
جەیدن سانچۆ لە گواستنەوەی زستانەدا مانچێستەر یونایتد جێدەهێڵێت پاش کۆبوونەوە لەگەڵ ئێریک تێن هاگی راهێنەر.
بەر لە پشووی یارییە نێودەوڵەتییەکان، تێن هاگ سانچۆی بە هەوڵ نەدان لە مەشقەکان تۆمارکرد و سانچۆش راستەوخۆ وەڵامی دایەوە. بەگوێرەی رۆژنامەی سەنی بەریتانی، ئەمڕۆ تێن هاگ و سانچۆ کۆبوونەتەوە، بەڵام ئەمە کێشەکانی نێوانیانی چارەسەر نەکردووە.
بەگووتەی سەرچاوەکە سانچۆ لە گواستنەوەی زستانەدا یانەکە جێدەهێڵێت و ئەگەریش کریار نەبوو ئەوا بە خواستن دەڕوات بۆ شەش مانگ. پاشان لە هاویندا روودەکاتە یانەیەکی دیکە بەشێوەیەکی هەمیشەیی.
ئەمە لە کاتێکدایە، ئەنتۆنی هێرشبەری باڵی هەمان یانەش دوورخراوەتەوە بە تۆمەتی دەستدرێژی سێکسی. بەڵام سەن دەڵێت ئەمە هیچی لە بابەتەکە نەگۆڕیووە و تێن هاگ سوورە لەسەر ئەوەی نایەوێت سانچۆ یاری بۆ تیمەکەی بکات.
لاوە ئینگلیزییەکە لە 2021دا بە 70 ملیۆن پاوەند لە دۆرتموندەوە گوێزرایەوە بۆ مان یونایتد بەڵام سوودێکی ئەوتۆی نەبووە و لە 82 یاریدا تەنها 12 گۆڵی تۆمارکردووە.
