ناسر خلێفی باسی کیلیان ئێمباپێ دەکات
یاریگا –
ناسر خلێفی، سەرۆکی پاریس سانجێرمان ستایشێکی زۆری کیلیان ئێمباپێ دەکات.
سەرەڕای وەستانی تەواوی گفتوگۆکانی نێوان پاریس و ئێمباپێ، کەچی خلێفی لە لێدوانێکیدا، ستایشێکی زۆری ئەستێرە فەرەنسییەکە دەکات.
لە مێرکاتۆی هاوینەی رابردوودا، ئێمباپێ رایگەیاند، نایەوێت گرێبەستەکەی لەگەڵ پاریس سانجێرمان نوێ بکاتەوە و ئەم وەرزە، دوا وەرزی ئەو دەبێت لەگەڵ پاریس، ئەمەش بووە هۆی دوورخستنەوەی لە پێکهاتەی یانە و دواتر گەڕاندنەوەی.
Le président du PSG est à nouveau fan de Kylian Mbappé https://t.co/1j9Ht5WPLR
— Foot Mercato (@footmercato) September 6, 2023
خلێفی لە لێدوانێکیدا بۆ رۆژنامەی ریکۆردی پۆرتوگالیدا دەڵێت
کیلیان ئێمباپێ یاریزانێکی نائاساییە و کەسێکی زۆر سەرسووڕهێنەرە، هەروەها ئێستا راهێنەر و بەڕێوەبەرێکی وەرزشی زۆر باشمان هەیە. زۆر بەو رۆحەی ئێستای نێو پاریس سانجێرمان دڵخۆشم. پێم وایە لە ماوەی رابردوودا پاریس سانجێرمان یانەیەکی زۆر یەکگرتوو نەبوو. ئەم وەرزە، سەردەمێکی نوێی سانجێرمان دەستیپێکردووە و دەبێ سەرنجی تەواومان لەسەر ئەنجامەکان بێت. سەرنجی زیاتر لەسەر ئاست و هەڵسوکەوتی یاریزانان بێت. ئەگەر ئەم کارانە بکەین، دەتوانین ئەنجامی باش بەدەستبهێنین.
پێشتر رۆژنامەی لیکیپ بڵاویکردبووەوە، ئێمباپێ لە 100 ملیۆن یۆرۆی پاداشتی دارایی خۆشبووە، تاوەکو جارێکی دیکە بگەڕێتەوە پێکهاتەی سەرەکی پاریس سانجێرمان.
رۆژنامەکە روونیکردووەتەوە، هەرچەندە ئێمباپێ گەڕاوەتەوە پێکهاتەی سەرەکی PSG، بەڵام تاوەکو ئێستا بڕیاری لە نوێکردنەوەی گرێبەستەکەی نەداوە کە لە هاوینی داهاتوو بەسەردەچێت.
ئەگەر ئێمباپێ گرێبەستەکەی نوێ نەکاتەوە، ئەوا لە هاوینی داهاتوو، بەبێ بەرامبەر ریزی یانە پاریسییەکە جێدەهێڵێت و ریال مەدرید لە نزیکەوە چاودێری دەکات و پێشتر، چەندین جار هەوڵی گواستنەوەی داوە.
ئێمباپێ لە هاوینی ساڵی 2017 لە مۆناکۆوە پەیوەندی بە پاریس کرد، لەو ساتەوە 212 گۆڵی لە 260 یاریدا کردووە.
