ریال مەدرید لە گواستنەوەی یاریزانێکی مانچێستەر یونایتد نزیکبووەتەوە

یاریگا –

مانچێستەر یونایتد بیرۆکەیەکی نوێی خستووەتە بەردەم ریال مەدرید، تاوەکو گرێبەست لەگەڵ ئانتۆنی مارسیال واژۆ بکەن.

چەندین راپۆرتی رۆژنامەوانی باس لە ئۆفەرەکەی مان یونایتد بۆ ریال مەدرید دەکەن، ئۆفەرەکە بەم شێوەیەیە، بۆ ئەم وەرزە، مارسیال بە خواستن یاری بۆ مەدرید بکات و دواتر توانای گواستنەوەی هەمیشەیی بە بڕی 15 ملیۆن یۆرۆی هەبێت.

تیمەکەی کارلۆ ئانچێلۆتی لە قەیرانی بێ هێرشبەریدایە، ئێستا تەنیا خۆسێلوی وەک سەرەڕم هەیە، هەریەکە لە ڤینیسیۆس جونیۆر و رۆدریگۆ هێڵی پێشەوەی مەدرید تەواو دەکەن.

هەرچەندە ماوەیەکی کەم بۆ مێرکاتۆی هاوینە ماوە، بەڵام مانچێستەر یونایتد دەیەوێت مارسیال لە ریزەکانی نەمێنێت و مووچەکەی نەدات، چونکە پێویستییەکی ئەوتۆی پێنییە.

مارسیال ئەزموونی یاریکردنی لە لالیگا هەیە، ساڵی رابردوو بە خواستن یاری بۆ سێڤییا کرد.

یاریزانە فەرەنسییەکە لە هاوینی 2015 لە مۆناکۆوە پەیوەندی بە مانچێستەر یونایتد کرد و لە کۆی 300 یاریدا، 88 گۆڵی بۆ شەیتانە سوورەکان کرد.

لە دوای گواستنەوەی راسموس هۆیلوند، ماوەی یاری کردنی مارسیال لە تیمەکەی ئێریک تێن هاخ، زۆر کەمدەبێتەوە، بۆیە پەیوەندی کردن بە یانەیەکی دیکە، بژاردەیەکی کراوەیە.