یاریگا
بڕیارە کەریم بێنزێما هێرشبەری فەرەنسی یانەی ئیتیحادی سعودی بۆ رووبەڕووبونەوەی یانەی قوە جەویەی عێراقی سەردانی شاری هەولێر بکات.
یانەی قوە جەویەی عێراقی بۆ ئەنجامدانی یارییەکانی لە خولی یانە پاڵەوانەکانی ئاسیا، یاریگای شەهید فەرەنسۆ هەریری لە هەولێری پایتەختی هەرێمی کوردستانی هەڵبژاردووە و ئەو یانەیە لە کۆمەڵەی سێیەمی پاڵەوانتیەکە رووبەڕووی یانەکانی ئیتیحادی سعودی و سپاهانی ئێرانی و ئاجمەکی ئۆزبەکستان دەبێتەوە.
ئەوەی سەرنجی هاندەرانی هەرێمی کوردستان و عێراقی راکێشاوە هاتنی کەریم بێنزێما ئەستێرەی پێشووی یانەی ریال مەدریدی ئیسپانیا و ئێستای یانەی ئیتیحادی سعودیە و هەمووان چاوەڕێ هاتنی ئەو یاریزانەی خاوەنی خەڵاتی باڵۆن دۆری ساڵی 2022 دەکەن.
یانەی قوە جەویەی عێراقی رۆژی شەشی مانگی یازدەی ئەمساڵ لە گەڕی سێیەمی چامپیۆنزلیگی ئاسیا لە یاریگای شەهید فەرەنسۆ هەریری لە شاری هەولێر پێشوازی لە کەریم بێنزێما و یانەی ئیتیحادی سعودی دەکات.
