بارسا لەبەر دوو هۆکار رێگە بە گەڕانەوەی نێیمار نادات
یاریگا-لە درێژەی پڕوپاگندەکانی بازاڕی گواستنەوەدا ئەمڕۆ هەواڵی ئەوە بڵاوکرایەوە پاریس سان جێرمان نێیماری پێشکەشی بارسا کردووە و یانە ئیسپانییەکەش رەتیکردووەتەوە.
نێیمار لە 2017 دا بارسای بەرەو پاریس جێهێشت و بووە گرانبەهاترین گرێبەستی مێژوو، دوای شەش ساڵ لە رۆیشتنی بەردەوام دەنگۆی گەڕانەوەی ئەو یاریزانە لە ئارادایە.
بەگوێرەی موندۆ دیپۆرتیڤۆی ئیسپانی، لە مانگی شەش دا پاریس پەیوەندی بە بارسێلۆناوە کردووە تاوەکو ئەو یاریزانە بگەڕێننەوە ریزەکانیان لە بەرامبەردا وەڵامی چاڤی و تیمی تەکنیکی ئەوە بووە نێیمار خاوەنی بەهرە و توانایەکی گەورەیە بەڵام نایانەوێت ئەو کەشە ئەرێنییە گەنجەی لە ژووری خۆگۆڕین دروست بووە بە هێنانی ئەستێرەیەکی دیار بشێوێنن. ئەمە جگە لەوەی مووچە بەرزەکەی ئەو یاریزانە لە توانای یانەکەدا نیە.
نێیمار ساڵانە 60 ملیۆن یۆرۆ لە پاریس وەردەگرێت و دوو وەرز لە گرێبەستەکەی ماوە. یانەکە ئامادەیە بیفرۆشێت ئەگەر بڕە پارەیەکی باشییان پێشکەش بکرێت.
