ئیتاڵیا
فیۆرێنتینا لە شوێنی یوڤێنتوس بەشداری کۆنفڕانس لیگ دەکات
یاریگا
رۆژی هەینی رابردوو یوێفا بە فەرمی یانەی یوڤێنتوسی ئیتاڵی بەهۆی سەرپێچیە داراییەکانی لە کۆنفڕانس لیگ بێ بەش کرد و ئەمڕۆش رایگەیاند فیۆرێنتینا لە شوێنی ئەوان بەشداری دەکات.
وەک چاوەڕوان دەکرا، یەکێتی تۆپی پێی ئەوروپا بە فەرمی ڕایگەیاند یانەی فیۆرێنتینا کە وەرزی ڕابردوو پلەی هەشتەمی خولی ئیتاڵیای بەدەستهێناوە و پلەیەک لە دوای یوڤێنتوس بوو، لەبری خانمە پیرەکە بەشداری لە کۆنفڕانس لیگ دەکات.
یوڤێنتوس وەرزی رابردوو بەهۆی ئەو سزایەی بەسەریدا سەپێندرا و 10 خاڵی لە سێریائەی لێکەمکرایەوە، لە پلەی سێیەمەوە بۆ پلەی حەوتەمی خولەکە دابەزی، هەر ئەمەش وایکرد لە چامپیۆنزلیگ و یۆرۆپالیگ بێ بەش بێت.
دوای سزادانی بیانکۆنێری لەلایەن ئەنجومەنی سێریائەی، ئەمجارەیان یوێفا بڕیاریدا بەهۆی ئەو سەرپێچیە داراییانە ئەو یانەیە سزا بدات و لە کۆنفڕانس لیگ بێ بەشی بکات.
