قازانجە خەیاڵییەکەی ئەتەلەنتا لە فرۆشتنی هۆیلوند

یاریگا-میدیاکانی ئینگلتەرا بە نیگەرانییەوە باس لە گواستنەوەی راسموس هۆیلوند دەکەن بۆ مانچێستەر یونایتد بەهۆی ئەو پارە خەیاڵییەی یانەکە دەیدات بۆ یاریزانێکی تازە دەرکەوتوو.

شەوی رابردوو، ئەتەلەنتا و یونایتد رێککەوتن لەسەر گواستنەوەی هێرشبەرە نەرویجییەکە بەرامبەر بە ٩٠ ملیۆن دۆلار، ئەمە لە کاتێکدا ناوبراو بە کەمتر لە 20 ملیۆن دۆلار بەر لە ساڵێک روویکردە ئەتەلەنتا لە ستورم گرازەوە.

راسموس لەو ساڵەدا لە کۆی 32 یاری، نۆ گۆڵی بۆ ئەتەلەنتا تۆمارکرد، یانە ئیتاڵییەکەش بۆ هەر گۆڵێک 10 ملیۆن دۆلاری خستووەتە سەر نرخی ئەو یاریزانە!

یونایتد بە هیوایە هالاندێکی دیکەی لە هۆیلوند دۆزیبێتەوە بەڵام قومارێکی گەورەی کردووە و هەمووان چاوەڕوانن بزانن بەرهەمی دەبێت یاخود هاوشێوەی گواستنەوەکانی دیکەی وەکو پۆگبا، سانچۆ، لوکاکو، ئەنتۆنی و مەگوایەر دەبێت کە پێنج گرانبەهاترین گرێبەستی مێژووی یانەکەن و هیچ کامێکیان نەگەشتنە ئەو ئاستەی هاوتای نرخەکەیان بێت.