یاریگا –
هۆكاری ئامادەنەبوونی كیلیان ئێمباپێ ئەستێرەی هەڵبژاردەی فەڕەنسا و یانەی پاریس سان جێرمانی فەڕەنسی لە بەرگی EA FC 24 ئاشكرا بوو.
وەرزی رابردوو كیلیان ئێمباپێ ئەستێرەی یەكەم بوولەسەر بەرگی یارییەكە و لەم وەرزەدا ئێرلینگ هالاند ناوی یەكەمە لەسەر بەرگی یارییە ئەلیكترۆنیەكە.
EA FC 24 یەكەم وەشانی یارییەكەیە لەسەر كۆمپانیا EA SPORTS دوای جیابوونەوەیان لە FIFA لە دوای 30 ساڵ كاركردن پێكەوە.
ئێمباپێ ناوی یەكەم بوو لەسەر بەرگەكانی 21 , 22 , 23 دواتر جێگاكەی بۆ ئێرلینگ هالاند چۆڵكرد.
رۆژنامەی لۆ پاریسیانی فەڕەنسی هۆكاری دوورخستنەوەی كیلیان ئێمباپێی لەسەر بەرگی یارییەكە ئاشكرا كرد.
رۆژنامە فەڕەنسیەكە كە نزیكە لە پاریس سان جێرمان ئاشكرایكرد، پاریس داوای لە كۆمپانیاكە كردووە ئەو یاریزانانە بخاتە روو كە خۆی دەیەوێت بەشداری لە بازاڕگەری یارییەكەدا بكات.
بەپێی راپۆرتەكەی لۆ پاریسیان، پاریس سان جێرمان ناوەكانی ماركۆ ئاسێنسیۆ و لی كانگ ئین یاریزانە نوێییەكانی یانەكەی لەگەڵ ماركینیۆس كاپتنی یانەكەی بە كۆمپانیاكە داوە و ناوی هێرشبەرە فەڕەنسیەكەی بە تەواوی دوورخستووەتەوە.
رۆژنامەکە ئاماژەی بەوەکردووە، کۆمپانیاکە ئێمباپێی نەخستۆتە لیستی رەشەوە، بەڵکو بە سادەیی بڕیاریداوە ئەو یاریزانە نەخاتە ناو کەرەستەی مارکێتینگ بۆ یارییە نوێیەکەی لەسەر داوای یانەکە.
تا ئێستا داهاتووی ئێمباپێ لەگەڵ پاریس سان جێرمان دیار نیە یاریزانەكە دەیەوێت وەرزی داهاتوو لە پاریس بمێنێتەوە و هاوینی 2024 پەیوەندی بە ریال مەدریدەوە بكات، یانەكەش دەیەوێت یان ئەم هاوینە بڕوات یان گرێبەستەكەی نوێ بكاتەوە.
