یاریگا –
تۆنی کروس یاریزانی یانەی ریال مەدرید پێی وایە کلاسیکۆ هەرگیز یارییەکی دۆستانە نییە و دەبێت لە هەر بارودۆخێکدا لە بارسێلۆنا ببەنەوە.
هەردوو یانەی بارسێلۆنا و ریال مەدرید بۆ کەمپی پێش وەرز روویان لە ئەمریکا کردووە بۆ ئەوەی پێش دەستپێکردنی یارییەکانی لالیگا زیاتر خۆیان ئامادە بکەن.
لەسەر بنەمای گرێبەستی ریکلام و بازرگانی کە سەرۆکی هەردوو یانە واژۆیان کردووە، پێش دەست پێکردنەوەی خول تیپەکانیان دەبێت گەشت بکەن بۆ ئەمریکا بۆ ئەنجامدانی مەشق و راهێنان و ئەنجامدانی چەند یارییەکی دۆستانە.
یارییە دۆستانەکەی نێوان ئەم دوو یانەیە بڕیارە لە 8ی ئاب لە یاریگای داڵاس بەڕێوە بچێت کە دەبێتە یەکەم یاری کلاسیکۆی وەرزی 2023-2024.
پێگەی فەرمی ریال مەدرید چاوپێکەوتنێکی لەگەڵ کروس کردووە و لەبارەی کلاسیکۆوە پرسیاری لێدەکات.
تۆنی کروس لەبارەی یاریەکەیان بەرامبەر بارسێلۆنا گۆتی:
ئەمە یارییەکی تایبەتە و لە یاریگایەکی تایبەت ئەنجام دەدرێت. کلاسیکۆ یەکێکە لەو یارییانەی کە وشەی دۆستانەی بۆ بەکار نایەت. یاری بەرامبەر بارسێلۆنا هەرگیز دۆستانە نییە و نابێت، ئێمە دەبێت بیبەینەوە.
ئەم جۆرە یارییانە یارمەتیدەرمان دەبن بۆ ئەوەی پێش دەستپێکردنی وەرز بگەینە هاوسەنگیەکی باش. ئەم یارییە سێیەم یاری ئامادەکاریمانە لە پێش وەرزدا و هیوادارم بە شێوەیەکی جەستەیی باش لەو یارییە ئامادە بین و سەرکەوتن بەدەست بهێنین چونکە هەرگیز یارییەکی دۆستانەمان بەرامبەر بارسێلۆنا نییە.
