سانجێرمان هەوڵ بۆ یاریزانێکی لاو دەدات

یاریگا

وابڕیارە بەم نزیکانە یانەی پاریس سانجێرمانی فەرەنسا دەست بە هەوڵەکانی بکات بۆ گواستنەوەی برادلی بارکۆلا لە ریزەکانی یانەی ئۆڵمپیک لیۆن.

فابریزیۆ ڕۆمانۆ بڵاویکردەوە، بەرپرسانی شازادەکان لەسەر داوای لویس ئێنریکێ راهێنەری ئیسپانی یانەکەیان هەوڵ بۆ گواستنەوەی یاریزانە لاوەکەی لیۆ دەدەن و بەم دواییەش پەیوەندیان بە یاریزانەکە کردووە و یاریزانەکەش رازیە بە گواستنەوەی بۆ یانەکەی پایتەختی فەرەنسا.

رەنگە گواستنەوەی بارکۆلا بۆ ریزەکانی سانجێرمان قورس بێت، لەبەر ئەوەی یانەکەی واتە ئۆڵمپیک لیۆن تووشی سزا بووە و ناتوانێت شوێنگرەوەی بگوازێتەوە.

ئەم یاریزانە راست پێیە توانای یاریکردنی وەک هێرشبەری باڵی چەپیشی هەیە، وەرزی ڕابردوو 7 گۆڵ و 10 ئەسیست بۆ یانەکەی تۆمارکرد لە سەرجەم پاڵەوانێتییەکان. هەروەها گرێبەستەکەی لەگەڵ لیۆن تا ساڵی 2026 کارا دەبێت.