ئۆفەرێکی گەورە لە سعودیە پێشکەشی ئیمۆبێلی کراوە
یاریگا
ئۆفەرێکی گەورە پێشکەش بە چیرۆ ئیمۆبیلی کاپتنی یانەی لازیۆی ئیتاڵیا کراوە، بەڵام ئەو یاریزانە بڕیاری کۆتایی نەداوە.
ئەگەری ئەوە هەیە لازیۆ پایەیەکی تری تیپەکەی لەدەست بدات دوای ئەوەی سێرجی میلینکۆڤیچ ساڤیچ پەیوەندی بە یانەی هیلالەوە کرد لە سعودیە، ئەمجارەیان یانەکانی سعودیە بەختی خۆیان تاقی دەکەنەوە بۆ گواستنەوەی چیرۆ ئیمۆبیلی کاپتنی یانەکەیان.
ئەلفرێدۆ پیدۆلا رۆژنامەنوسی ئیتاڵی بڵاویکردەوە، یانەیەکی سعودی پێشتر ئۆفەرێکی 2 ساڵەی پێشکەش بە چیرۆ ئیمۆبیلی کردووە لەگەڵ بژاردەی درێژکردنەوەی بۆ ساڵی سێیەم و مووچەی ساڵانەی 18 ملیۆن یۆرۆ، ئەمڕۆش ئۆفەری فەرمی خۆی بۆ لازیۆ ناردووە.
سەرچاوەکە بڵاویشی کردەوە پێدەچێت ئەو یانەیەی کە باسی لێوە دەکرێت یانەی شەباب بێت، بەڵام ئەگەری ئەوەش هەیە کە وەحدە ئەم ئۆفەرەی ناردبێت چونکە لە چەند هەفتەی ڕابردوودا هەوڵی ڕازیکردنی ئەم یاریزانەیان داوە.
