پاریس سانجێرمان ناتوانێت هیچ کەمتەرخەمیەک بەرامبەر ئێمباپێ بکات
یاریگا
کلیان ئێمباپێ بەهۆی ئەوەی ئامادەنیە گرێبەستەکەی لەگەڵ پاریس سانجێرمان نوێ بکاتەوە، رەنگە لەلایەن یانەکەیەوە پشتگوێ بخرێت، بەڵام برگەیەکی فیفا هەیە کە ناهێڵێت هیچ کەمتەرخەمی بەرامبەر یاریزانەکان بکرێت.
رۆژنامەی وەرزشی مارکای ئیسپانی بڵاویکردەوە، هیچ رێگەیەکی یاسایی نییە کە پاریس بتوانێت ئێمباپێ ناچار بکات بەپێچەوانەی ویستی خۆی لە یانەکەیان بڕوات، هەروەها ناکرێت فشار بخرێتە سەری بە دوورخستنەوەی لە چالاکی ڕۆژانەی تیپەکە، بۆیە یانەکە زۆر وریایە لە هەموو ئەو شتانەی لەسەر ئەو یاریزانە ڕوودەدەن، چونکە ئەو کاتە یاریزانەکە دەتوانێت بە پێی برگەی 14 لە فیفا گرێبەستەکەی هەڵوەشێنێتەوە.
بەرپرسانی شازادەکان هەموو هەوڵێک بۆ رازیکردنی ئێمباپێ دەدەن بۆ نوێکردنەوەی گرێبەستەکەی، بەڵام ئەو یاریزانە سورە لەسەر بڕیارەکەی، بۆیە هەڕەشە لەو یاریزانە کراوە یان دەبێت گرێبەستەکەی نوێ بکاتەوە، یان دەبێت ئەم هاوینە یانەکەیان جێبێڵێت ئەمەش پێچەوانەی یاساکانی فیفایە لە بازاڕی گواستنەوەی یاریزانان.
هێرشبەرەکەی شازادەکان تەنها بە یەک مەرج ئامادەیە لەسەر ویستی خۆی یانەکەی جێبێڵێت، ئەویش وەرگرتنی پارەی شیرینی نوێکردنەوەی گرێبەستەکەیەتی کە نزیکەی 200 ملیۆن یۆرۆیە، بە پێچەوانەوە تاوەکو کۆتایی گرێبەستەکەی کە ساڵی 2024 کۆتایی دێت، لەگەڵ یانەکەی بەردەوام دەبێت.
ئێمباپێ ئەگەر گرێبەستەکەی نوێ نەکاتەوە، ئەو کاتە بۆی هەیە سەرەتای ساڵی داهاتوو بە ئاشکرا گفتوگۆ لەگەڵ ئەو یانەیە بکات کە ئارەزووی چوونی بۆ دەکات و پاشانیش هاوینی 2024 پەیوەندی پێوە بکات.
