ساڤیچ نزیکە لە پەیوەندی کردن بە یانەی هیلال
یاریگا
سێرگی میلینکۆڤیچ ساڤیچ یاریزانی سربیی یانەی لازیۆی ئیتاڵیا گڵۆپی سەوزی بۆ یانەی هیلالی سعودی هەڵکردووە.
سەرەتا فابریزیۆ رۆمانۆ رۆژنامەنوسی ئیتاڵی بوو کاتێک بڵاویکردەوە یانەی هیلالی سعودی ئۆفەرێکی 40 ملیۆن یۆرۆیی بۆ گواستنەوەی ناوەڕاستکارەکەی لازیۆ پێشکەش کردووە و ئامادەن ئەو یاریزانە بۆ ماوەی سێ وەرز بگوازنەوە ریزەکانیان.
دواتر جیانلوکا دی مارزیۆش بڵاویکردەوە یانەی سعودیەکە 40 ملیۆن یۆرۆی پێشکەش بە لازیۆ کردووە بۆ ئەوەی سێرجی میلینکۆڤیچ ساڤیچ بگوازێتەوە، کە تەنها وەرزێکی دیکەی ماوە بۆ گرێبەستەکەی لەگەڵ لازیۆ.
ئەم یاریزانە تەمەن 28 ساڵە گڵۆپی سەوزی بۆ گواستنەوەی بۆ سعودیە هەڵکردووە، ئێستاش لازیۆ کە ئامانجی هێشتنەوەی ناوەڕاستکارەکەی بوو، بڕیارە لە چەند کاتژمێرێکی تردا دانوستان لەسەر وردەکاری گرێبەستەکە لەگەڵ هیلال بکات.
لەلایەکی دیکەوە هەروەها سکای ئیتاڵیا بڵاویکردەوە یانەی هیلال 20 ملیۆن یۆرۆ مووچەی ساڵانە پێشکەشی ساڤیچ دەکات و دانوستانەکانی نێوان هەردوو یانە لە قۆناغی کۆتاییدان.
