یاریگا –
لە پۆرتوگال دراوسێکانی کریستیانۆ رۆناڵدۆ بێزار و تووڕەن، بەهۆی درێژەکێشانی درووستکرانی خانووەکەی.
ماوەی سێ ساڵە ئەفسانەی پۆرتوگالی کریستیانۆ رۆناڵدۆ، دەستیکردووە بە درووستکردنی کۆشکێکی زەبەلاح لە نیشتیمانەکەی خۆی، کە بەنیازە دوای وازهێنان لە یاریکردن لەگەڵ خێزانەکەی تیایدا نیشتەجێ ببێت.
کۆشکەکەی رۆناڵدۆ لە شاری لیسبۆنی پایتەختی پۆرتوگالە، دەکەوێتە ناوچەی گەشتیاری کوینتا دا مارینها، شوێنێکی دڵڕفێنە و رووی لە زەریای ئەتڵەسی کردووە.
رووبەری زەوییەکەی 2720 مەتری چوار گۆشەیە، کۆی ئەو زەوییەی بیناسازی لەسەر دەکرێت پێکهاتووە لە 1100 مەتری چوارگۆشە، بە شێوەیەک فراوان و زەبەلاحە خەڵکی ناوچەکە بە نەخۆشخانەی دەچوێنن.
تێچووی ئەم پرۆژە مەزنەی ئەستێرە پۆرتوگالییەکە 20 ملیۆن یۆرۆیە، ماوەی 3 ساڵە کارکردن تیایدا بەردەوامە، هێشتا ساڵێکی دیکەی پێویستە بۆ تەواو بوونی کارەکانی.
بەهۆی درێژە کێشانی کارەکانی درووستکردنی ئەم کۆشکە، دانیشتوانی ناوچەکە لە کریستیانۆ تووڕەن، دانیشتوویەکی ناوچەکە لەو بارەیەوە بەمشێوەیە بۆ رۆژنامەی مۆندۆ دیپۆرتیڤۆ دواوە:
بێزاربووین، چەند مانگێکە شەقامەکەمان داخراوە، باخچەکەم پڕ لە خۆڵە، هەمووی بەهۆی هەڕەمی فیرعەون “کریستیانۆ رۆناڵدۆ”یە.
هۆکارێکی دیکە کە پۆرتوگالییەکانی نیگەرانکردووە ئەوەیە، کۆشکەکە زۆر دیار و بەرکەوتەیە، بە جۆرێک دەکەوێتە پشت هۆتێل و یاریگایەکی گەورەی گۆڵفەوە، کە باس لەوە دەکرێت ئەستێرە پۆرتوگالییەکە هەوڵێکی زۆری داوە و پارەیەکی زۆری خەرجکردووە تا ئەو زەویە بکڕێت.
🏡 Segundo informações, @Cristiano está construindo uma casa de repouso para ele e sua família na Quinta da Marinha em Portugal, o projeto está avaliado em cerca de 21 milhões de dólares. 💰💵 pic.twitter.com/oVBel71Tkh
— CR7 MIL GRAU (@MILGRAUCR7) June 14, 2022
رۆناڵدۆی تەمەن 38 ساڵان ئێستا لە خولی سعودی و لەگەڵ یانەی نەسڕ بەدەوامە لە یاریکردن، نیازی وایە تا تەمەنی 40 ساڵی بەردوامبێت لە یاریکردن، دواتریش بە یەکجاری واز لە یاریکردن بهێنێت.
پاش وازهێنانیش دەگەڕێتەوە پۆرتوگال، لەگەڵ تەواوی خێزانەکەی لەم کۆشکە پڕ تێچوو و گرانبەهایەی دەست بە ژیانێکی نوێ دەکات.
