بایرن میونشن گەشبینە بە گواستنەوەی هاری کەین
یاریگا
هاری کەین هێرشبەری ئینگلیزی یانەی تۆتێنهام نایەوێت گرێبەستەکەی لەگەڵ یانەکەی نوێ بکاتەوە، ئەمەش وایکردووە قسە و باسێکی زۆر لەسەر داهاتووی لە گواستنەوەی هاوینەی ئەمساڵدا بکرێت.
لەم دۆخەدا یەکێک لەو یانانەی ئارەزووی گواستنەوەی دەکات بایرن میونشنە، بەڵام پێشتر هەندێک لە میدیاکان بانگەشەی ئەوەیان کردبوو کە ئەو پێشنیارەکەی بایرن ڕەتکردۆتەوە، بەڵام باڤارییەکان پێناچێت هیوایان لەدەستدابێت.
هەر یەکە لە کریستیان فالک و تۆبی ئاڵتشفێلی لە رۆژنامەی بیڵد بڵاویان کردووەتەوە، بایرن میونشن هێشتا کار لەسەر چارەسەرێکی گەورە دەکات بۆ پۆستی هێرشبەری ژمارە 9 و ئامانجی سەرەکیشیان هێرشبەرەکەی تۆتێنهامە.
سەرەڕای ئەو هەواڵانەی باس لەوە دەکەن کە کاپتنەکەی تۆتنهام ئەو ئۆفەرەی باڤارییەکانی ڕەتکردووەتەوە، بەڵام لەم یانەیەدا هێشتا هیوایان بەم گواستنەوەیە هەیە و ناوی ئەم یاریزانە ئینگلیزییە یەکێکە لەو بابەتانەی کە لە کۆبوونەوەکانی ئیدارەی ئەم یانەیەدا باسی لێوە دەکرێت.
هاری کەین تاوەکو ساڵی 2024 گرێبەستی لەگەڵ یانەکەی ماوە، بۆیە ناتوانێت بە ئارەزووی خۆی یانەکەی جێبێڵێت، مەگەر یانەیەک ئامادەبێت مەرجی هەڵوەشاندنەوەی گرێبەستەکەی کە 100 ملیۆن یۆرۆیە پێشکەشی یانە لەندەنیەکە بکات.
