پاریس سانجێرمان ئامادەیە کلیان ئێمباپێ بداتە مانچێستەر یونایتد

یاریگا
–
کلیان ئێمباپێ هێرشبەری فەرەنسی یانەی پاریس سانجێرمانی فەرەنسا رەنگە ناچار بکرێت وەرزی داهاتوو لە بڕی لالیگا یاریی لە پرێمەرلیگ بکات، لەبەر ئەوەی کارگێری یانەکەی بە هیچ شێوەیەکی ئامادەنیە ئەو یاریزانە بداتە ریال مەدرید.

پاش ئەوەی کلیان ئێمباپێ هێرشبەری فەرەنسی پاریس سانجێرمان یانەکەی ئاگادار کردەوە ئامادەنیە گرێبەستەکەی نوێ بکاتەوە، یانەکە کەوتووەتە خۆی بۆ ئەوەی ئەم هاوینە بەرامبەر پارەیەکی باش دەستبەرداری بێت و دەنگۆیەکی بەهێزیش هەیە ئەو یاریزانە خەون بە یاریکردن بە درێسی ریال مەدرید دەبینێت.

سەرچاوەکانی نێوخۆی ئیسپانیا لەوانەش RELEVO بڵاویکردووەتەوە کارگێری یانە شاهانەکە ئامادەیە 180 بۆ 200 ملیۆن یۆرۆ لە پێناو بەدەستهێنانی تواناکانی گۆڵکارە لاوەکەی کەلەشێرەکان خەرج بکات و هیچ کێشەیەکیان لەگەڵ تێچووی گواستنەوەکە نابێت.

لەلایەکی دیکەوە ئەمڕۆ رۆژنامەی دەیلی مەیلی بەریتانی بڵاویکردەوە، شازادەکان ئامادەن ئەو یاریزانە بدەن مانچێستەر یونایتد، ئەگەر شێخ جاسمی قەتەری و هاونیشتیمانیەکەی ناسر خلێفی سەرۆکی شازادەکان، سەرکەوتوو بە لە کڕینی ئەو یانەیە.

ئێمباپێ هاوینی ساڵی 2024 گرێبەستەکەی کۆتایی دێت و بڕگەیەکیش لە گرێبەستەکەی هەیە دەتوانێت بۆ ساڵێکی دیکەش گرێبەستەکەی نوێ بکاتەوە، بەڵام ئەو یاریزانە بەم دواییە یانەکەی ئاگادار کردووەتەوە ئامادەنیە ئەو بڕگەیە کارا بکات.