دایکی ئێمباپێ وەڵامی هاندەرێکی ریال مەدرید دەداتەوە

یاریگا –

دایکی کیلیان ئێمباپێ، هاوکێشەی کوڕەکەی زیاتر ئاڵۆز دەکات.

پلاتفۆرمی رێلێڤۆی ئیسپانی بڵاویکردووەتەوە، لە یاری نێوان هەڵبژاردەی فەرەنسا و گیبرالتار، هاندەرێک خۆی لە فایزە مەعماری، دایکی ئێمباپێ نزیکردەوە و پرسیاری لێکرد، ئایا ئێمباپێ لە ریال مەدرید دەبینین، دایکی ئێمباپێش بە پێکەنینەوە گووتی

پاریس، پاریس، پاریس.

دایکی ئێمباپێ ئامادەی یاری هەڵبژاردەی فەرەنسا و گیبرالتار بوو، کە بە ئەنجامی 3-0 لە بەرژەوەندی کەڵەشێرەکان تەواو بوو و ئێمباپێ گۆڵێکی لە یارییەکەدا کرد.

چەند رۆژێک لەمەوبەر، ئێمباپێ بە کارگێڕی پاریس سانجێرمانی راگەیاند، گرێبەستەکەی تاوەکو هاوینی 2025 نوێ ناکاتەوە و ئەمساڵ دوا ساڵی دەبێت لە پاریس. ئەم بڕیارەی کیلیان، یانە پاریسییەکە شۆک کردووە.

ئەگەر ئێمباپێ تاوەکو هاوینی داهاتوو لە پاریس مایەوە، ئەوا بە ناچاری بە گرێبەستێکی ئازاد دەتوانێت ریزەکانی پی ئێس جی جێبهێڵێت، بۆیە پاریس دەیەوێت دەرچەیەکی نوێ بۆ دەستبەرداربوون لە کیلیان بدۆزێتەوە.

لە هاوینی ساڵی 2022، ئەستێرە فەرەنسییەکە زۆر لە ریال مەدرید نزیکبوو، کەچی لە کۆتاییدا گرێبەستەکەی لەگەڵ پاریس سانجێرمان تاوەکو 2024 نوێکردەوە. لە گرێبەستەکەدا بەندێک زیاد کراوە، ئەویش بە دەبێ بە رەزامەندی هەردوولایەن بێت، بۆ درێژکردنەوەی گرێبەستەکەی تاوەکو هاوینی 2025.

خۆسێ فێلیکس دیاز، رۆژنامەنووسی دیاری ئیسپانی روونیکردووەتەوە، ریال مەدرید هیچ هەنگاوێک بۆ گواستنەوەی ئێمباپێ نانێت، تاوەکو پاریس و کیلیان لەسەر نرخێک رێکدەکەون.