دایکی ئێمباپێ دەبێتە بەڕێوبەری کارەکانی ئیمباپێ و چەند یاریزانێکی تر

یاریگا –

دایکی کیلیان ئێمباپێ هاتە ناو جیهانی بریکارەکانی تۆپی پێ و کۆمپانیایەکی دامەزراند کە تایبەتە بەم بوارە.

رۆژنامەی مارکا بڵاویکردەوە، فایزا لاماری دایکی کیلیان ئێمباپێ، کۆمپانیایەکی گواستنەوەی یاریزانانی تۆپی پێی دامەزراندووە و بووەتە بریکاری چەند یاریزانێکی گرنگ.

بێگومان گرنگترین یاریزان کە ئەم کۆمپانیایە نوێنەرایەتی دەکات، خودی کیلیان ئێمباپێی کاپتنی پاریس سانجێرمان و هەڵبژاردەی فەرەنسایە. هەروەها ئیتان ئێمباپێ، برا بچووکەکەی کە یاری بۆ یانەی پاریس سانجێرمانی خوار 19 ساڵان دەکات، لە ڕیزبەندی کۆمپانیاکە دایە.

هەروەها کۆمپانیاکە نوێنەرایەتی رایان چێرکی یاریزانی هێرشبەری یانەی لیۆنی هەیە کە یاریزانەکە لە گواستنەوەی زستانەدا نزیک بوو لە پەیوەندی کردن بە یانەی پاریس سانجێرمان لەماوەی چەند مانگی رابردوودا چەند دانیشتنێک لەنێوان چێرکی و خێزانی ئێمباپێدا هەبووە، لەم دواییانەشدا گەیشتوونەتە رێککەوتن لەسەر ئەوەی دایکی ئێمباپێ ببێتە بریکاری ئەستێرەی لیۆن.

هەرچەندە چەند یانەیەک بەدوای گرێبەست کردنن لەگەڵ چێرکی تەمەن 19 ساڵەدا، بەڵام پێدەچێت گرنگترین ئەرکی کۆمپانیاکە لە هاوینی داهاتوودا دیاریکردنی ئەرکی نوێی کیلیان ئێمباپێ بێت کە بووەتە بابەتێکی گەرمی میدیاکان.

گرێبەستەکەی ئێمباپێ لەگەڵ پاریس سانجێرمان تا هاوینی داهاتوو کارا دەبێت و بە فەرمی بە یانەکەی راگەیاندووە کە گرێبەستەکە نوێ ناکاتەوە. بەم شێوەیە یانەی پاریس سانجێرمان یان دەبێت لەم هاوینەدا بیفرۆشێت یان ساڵی داهاتوو وەکو یاریزانێکی ئازاد لەدەستی بدات.