بارسێلۆنا گەشبین نیە بە گواستنەوەی سیلڤا

یاریگا

بێرناردۆ سیلڤا ناوەڕاستکاری پۆرتوگالی یانەی مانچێستەر سیتی ئینگڵتەرا، یەکێکە لە ئامانجەکانی ئەم هاوینەی بارسێلۆنا و لە هەمان کاتدا بەرپرسانی یانەکە ئەوەندە گەشبین نین بە گواستنەوەی.

رۆژنامەی SPORT کەتەلۆنی بلاویکردەوە یەکێک لە ئامانجەکانی ئەم هاوینەی بلاوگرانا بۆ هێلی ناوەڕاست، یاریزانەکەی مانچێستەر سیتیە و چاوەڕێش دەکرێت ئەو یاریزانە دوای یاریی کۆتایی چامپیۆنزلیگ داهاتووی خۆی یەکلایی بکاتەوە.

سپۆرت بڵاویشی کردەوە بێرناردۆ سیلڤا یەکێک بوو لە ئامانجەکانی وەرزی ڕابردووی بلاوگرانا، بەڵام دۆخی ئابوری یانەکە رێگری لە گواستنەوەکەی کرد. بارسێلۆنا تەنها رێگایەکی لەبەردەمە بۆ گواستنەوەی ئامانجەکەی، ئەویش چوونی فرانک دی یۆنگی هۆڵەندی ناوەڕاستکارە.

بەرپرسانی بارسا بەهۆی یاسای دارایی خاوێن سەرەتا پێویستە دەستبەرداری چەند یاریزانێک بن بۆ ئەوەی بتوانن یاریزانی دیکە بگوازنەوە ریزەکانیان، ئەمەش گەورەترین کێشەی یانەکەیە.

سیلڤا گرێبەستی لەگەڵ مانچێستەر سیتی ماوە، ئەمەش کێشەیەکی دیکەیە بۆ بارسێلۆنا، چونکە ناتوانن بەبێ پرسی یانەکە هیچ رێکەوتنێک بکەن. خودی یاریزانەکەش ئارەزوی لەبەر کردنی درێسی بلاوگرانای هەیە، بەڵام گرێبەستەکەی لەگەڵ ستیزن رێگری لە ئارەزووەکەی دەکات.