دۆناروما باس لە داهاتووی خۆی دەکات لە پاریس

یاریگا –

جیانلویجی دۆنارومای ئیتاڵی، باس لە داهاتووی خۆی دەکات لە پاریس سانجێرمان.

دۆنارومای تەمەن 24 ساڵان و ئەستێرەی یانەی پاریس سانجێرمان لە لێدوانێکی بۆ پێگەی ئۆنز مۆندیال، دڵخۆشی خۆی بە یاریکردن بۆ پاریس دەردەبڕێت، هیواش بە ماناوەی بۆ ماوەیەکی زیاتر لە خولەکەدا دەخوازێت.

جیجی لە لێدوانەکەیدا دەڵێت:

شانازی دەکەم کە نوێنەرایەتی ئەم یانەیە و شارەکەش دەکەم، لە دڵەوە هیواخوازم بۆ ماوەیەکی زیاتر لەگەڵ پاریس بەردەوامبم و مێژوو بنوسمەوە لەگەڵ یانەکەم.

گۆڵپارێزە ئیتاڵییەکە لە هاوینی ساڵی 2021 بە گرێبەستێکی ئازاد لە ئەیسی میلانەوە گواسترایەوە بۆ پاریس، بە درێسی یانە فەڕەنسییەکەش بەشداری 70 یاری کردووە لە سەرجەم پاڵەوانێتییەکان.

جیجی لە پاریس 71 جار تۆڕی گۆڵەکەی هەژێنراوە، لە 23 یاریشدا تۆڕی گۆڵەکەی بە خاوێنی پاراستووە، نازناوێکی خولی فەڕەنسی و نازناوێکی سوپەری فەڕەنساشی لەگەڵ یانەکەی بەدەستهێناوە.