مۆرینیۆ: سزادانی یوڤێنتوس وەکو نوکتە وایە

یاریگا

دادگای تێهەڵچوونەوەی فیدراڵی ئیتاڵیا بەهۆی پێشێل کردنی یاسای دارایی خاوێن، قازانجی یوڤێنتۆسی بە لێبڕینی10 خاڵ لەم وەرزەی سێریائەی سزادا.

خۆزێ مۆرینیۆ راهێنەری رۆما لەمبارەوە هاتە دەنگ و ئەم سزایە بە گاڵتەجاڕی دەزانێت

ئەمە گاڵتەیە. بەڕاستی تەنها دەبێت پێبکەنیت. سەرەتا 15 خاڵ لە یوڤی کەمکرایەوە، دواتر 15 خاڵ بۆیان گەڕێنرایەوە و دیسانەوە لە ماوەی دوو هەفتەدا 10 خاڵ لەم تیپە کەمکرایەوە. ئەم ڕووداوانە تەواوی هاوکێشە و پلانەکانی یوڤێنتوس و تیپەکانی تری تێکدا. بەڕاستی شتێکی لەم جۆرە لەم ئاستەدا سەیرە، پێشتر کاتێک یۆڤی 15 خاڵی لەدەستدا دڵنیا بووم کە ئەم سزایە هەڵدەوەشێتەوە. هەر بۆیە وتم ئەمە ئیتالیایە و هیچ شتێک بەلامەوە نامۆ نییە. چاوەڕێی ئەوەم نەدەکرد جارێکی تر 10 خاڵ لەدەست بدەن و ئێستا سەرم سوڕماوە. لەم وڵاتەدا هیچ سنوورێک نییە بۆ ئەوەی سەرسامت بکات

راهێنەرە پۆرتوگالیەکە لە بەشێکی دیکەی قسەکانیدا ئاماژە بە پلانەکانی یانەکەی دەکات و دەڵێت

ئەگەر پێش یارییەکانی ئێمە بەرامبەر مۆنتیزا یان بۆلۆنیا ئەم بڕیارە ئاشکرا بوایە، ئەوا ڕوانگەیەکی جیاوازمان لە خولی ئیتاڵیا دەبوو، هەموو شتێکمان بەخشی بۆ یۆرۆپا لیگ. زۆر بەزەییم بە ئەلێگری و یاریزانەکانیدا دێتەوە، چونکە ئەوان ئەو خاڵانەیان لە یاریگادا بەدەستهێنا، ئیتر نامەوێت باسی بکەم، بەزەییم پێیان دێتەوە.

یوڤێنتوس بەم سزایەی بلیتی وەرزی داهاتوو چامپیۆنزلیگ و یۆرۆپالیگی لەدەست دەچێت و بۆ پلەی هەشتەمی ریزبەندی سێریائەی دادەبەزێت.