پێرێز هۆکاری ئاستە بەرزەکەی ریال مەدرید بووە بەرامبەر بە مان سیتی

یاریگا –

شەوی رابردوو ریال مەدرید لە چامپیۆنزلیگ ئاستێکی بەرزی بەرامبەر بە مانچێستەر سیتی پێشکەشکرد، هۆکاری ئەمەش دەگەڕێتەوە بۆ فلۆرێنتینۆ پێرێزی سەرۆکی یانەکە.

پێگەی رێلێڤۆ بڵاویکردووەتەوە، پاش کۆتایی هاتنی یاری کۆتای جامی شای ئیسپانیا، بڕیار بووە ریال مەدرید لە نیوە شەو گەشت بکاتەوە بۆ مەدرید، بەڵام پێرێز رێگەی بەوە نەداوە.

سەرۆکی یانەکە کاتێک هەستی کردووە یاریزانەکان شەکەتن و خەواڵوون، دوایکردووە گەشتەکە دوابخەن بۆ بەیانی تا تیپەکە بتوانێت بەباشی بخەوێت و پشوو بدەن.

چەند هەفتەیەک بەر لە یارییەکە، پێرێز قسەی لەگەڵ ئانچێلۆتی کرد، چاویشی لەسەر یارییەکەی سیتی بوو. کاری لە پێشینەی پێرێز، حەسانەوەی یاریزانان بوو. هەر خۆی پێشنیازی مانەوەی تیمەکەی لە سێڤییا کرد، رۆژی دواتر گەڕانەوە مەدرید، بۆ ئەوەی یاریزانان بتوانن زیاتر بخەون.

سەرەڕای ئەمەش، کارەکە زۆر باش نەبوو بۆ یاریزانەکان، چونکە لەو ماوەیەدا لە خێزان و منداڵەکانیان دوورخرانەوە. پێدەچێت ئەمەش کاریگەری ئەرێنی لەسەر یاریزانان هەبوو و لە یارییەکەی بەرامبەر مانچێستەر سیتی ئاستێکی باشیان پێشکەش کرد.

هەروەها پێرێز گوتوویەتی ئەگەر بەو کاتە درەنگە بگەڕێینەوە، رەنگە یاریزانەکان تا درەنگانی شەو لەگەڵ خێزانەکانیان ئاهەنگی ئەم سەرکەوتنە بگێڕن و پشوو نەدەن، ئەمەش کاریگەری خراپیان لەسەر جێدەهێڵێت.

سەرەڕای ئەوەی ریال مەدرید نەیتوانی یارییەکە بە سەرکەوتن لە بەرژەوەندی خۆی بە کۆتا بهێنێت، بەڵام دەرکەوتنی بە ئاستێکی بەرز پێچەوانەی هەموو پێشبینییەکان بوو، کە وا دانرابوو سیتیزن بە ئاسانی یارییەکە بباتەوە.