یاریگا –
راپۆرتە رۆژنامەوانیەكانی فەڕەنسا دانوستانەكانی نێوان لیۆنێل مێسی ئەفسانەی ئەرجەنتینی و پاریس سان جێرمانیان ئاشكرا كرد سەبارەت بە نوێكردنەوەی گرێبەستەكەی.
گرێبەستەكەی مێسی لەگەڵ پاریس لە هاوینی ئەمساڵدا بەسەردەچێت و لە ئێستادا هیچ رێككەوتنێك نیە لە نێوانیاندا بە مەبەستی نوێكردنەوەی.
بەپێی زانیاریەكانی رۆژنامەی لۆ پاریسیان لیۆنێل مێسی و پاریس سان جێرمان گەیشتوونەتە رێككەوتن سەبارەت بە نوێكردنەوەی گرێبەستەكەی لە دوای گەڕانەوەی یاریزانەكە لە یاریەكانی جامی جیهانی 2022ی قەتەڕ.
سەرچاوە فەڕەنسیەكە ئەوەشی ئاشكرا كردووە، لە دوا ساتەكاندا مێسی بڕیارەكەی خۆی گۆڕیووە و داوای موچەی 37 ملیۆن یۆرۆی كردووە.
لۆ پاریسیان ئەوەشی خستووەتە روو، ئەم داوایەی لیۆ بەڕێوەبەرانی یانە فەڕەنسیەكەی تووشی سەرسوڕمان كردووە و رەتیانكردووەتەوە، لەو كاتەوە تا ئێستا هیچ كام لا نەگەیشتوونەتە رێككەوتن بە بەمەبەستی نوێكردنەوەی گرێبەستەكەی.
سەرچاوەكان ئاماژە بەوەدەكەن كە موچەی ساڵانەی ئێستای لیۆنێل مێسی لەگەڵ یانەكەی دەگاتە 25 ملیۆن یۆرۆ.
